Майстар-класы

Майстар-класы

Усе майстар-класы толькі па папярэднім запісе. Кошты залежаць ад колькасці ўдзельнікаў і працягласці. Для праліку кошту на Вашую кампанію лістуйце starymensk@gmail.com – пазначайце майстр-клас і колькасць удзельнікаў.

1. “Беларускія традыцыі”

Прапануем 4 “блокі” па 30 хв – выбіраеце 2 любыя, такім чынам майстар-клас складае прыкладна 1 гадзіну (пры вялікай колькасці ўдзельнікаў – магчыма, трохі больш).

  1. Лялька-мотанка – традыцыйны беларускі абярэг, які бараніў хату і сям’ю ад ліха, хваробы і дурнога вока. Падчас майстар-класа вы даведаецеся пра гісторыю гэтага старажытнага абярэга, таямніцы яго выраблення, і, канешне, вырабіце уласны абярэг сваімі рукамі.
  2. Утульнасць, водар мёду, духмяныя зёлкі – усё гэта змяшчаецца ў катанай свечцы. На майстер-класе вы не толькі вырабіце свечку-катанку з ліставой вашчыны і зёлак, але і даведаецеся пра сімвалічнае, сакральнае і лекавае прызначэнне усім вядовых беларускіх зёлак і зможаце абраць і дадаць іх у свечку на свой густ.
  3. Набіванка – гэта тэхніка упрыгожвання тканіны з дапамогай набоек штампаў, якая вядома беларусам з даўніх часоў. Штампаў і узораў існавала вельмі шмат, і на нашым майстар-класе вы можаце азнаёміцца з азамі вырабу набіванкі, некаторымі відамі штампаў і вырабіць на тканіне ці паперы невялічкую набіваную кампазіцыю.
  4. Што рабіць, калі ў хату прыйшла хвароба, а побач няма ні шпіталя, ні лекара? Канешне, звяртацца па дапамогу да звышнатуральных сіл і прыроды. Лекаваліся на вёсках зёлкай, абрадам і словам, і гэта склалася ў часам дзіўную, часам незразумелую сучаснаму чалавеку традыцыю, пра таямніцы якой вы можаце даведацца на майстар-класе – лекцыі ў нашым музеі, на свае вочы пабачыць традыцыйныя сродкі лекавання на вёсцы і нават пачуць магічныя замовы.

Прыкладны кошт: пры колькасці 15 чалавек кошт на чалавека – ад 12 да 15 рублёў у залежнасці ад абраных “блокаў” (матэрыялы ўключаныя). Калі людзей менш за 15 – кошт майстар-класа раскідваецца на колькасць удзельнікаў. Напрыклад, за майстар-клас па ляльцы-мотанцы і катанай свечцы пры 15 удзельніках кошт за асобу – 15 р. Пры 10 удзельніках – 20 р. Пры колькасці ўдзельнікаў ад 20 чалавек кошт на асобу складзе 12 р.

2. Кулінарны майстар-клас

Вядомы кухар Францішак Мятлеўскі разам з вамі прыгатуе сучасныя альбо традыцыйныя беларускія стравы сялянскай ды шляхецкай кухні. А пасля – абавязкова дэгустацыя!

Майстар-клас можа быць праведзены як для дарослых, так і для дзяцей.

3. Выраб народных лялек

Разам з даследчыцай народных строяў Аляксандрай Мятлеўскай вы зможаце самі сплесці з нітак народную ляльку. Аляксандра працуе ў лабараторыі захавання гісторыка-культурнай спадчыны Нацыянальнай акадэміі навук, а таксама з’яўляецца рэканструктарам старадаўняй вопраткі. Так што на гэтым майстар-класе вы не толькі папрацуеце рукамі, але і даведаецеся шмат цікавага пра беларускія традыцыйныя строі.

4. Майстар-клас па фехтаванні і асновах рыцарскага этыкету

Гісторык-рэканструктар Юры Усціновіч навучыць вас фехтаваць, страляць з лука, а таксама распавядзе пра старадаўнюю зброю ды этыкет рыцараў. А пры вашым жаданні – і пакажа розныя віды зброі, ды правядзе рыцарскі двубой прама на замкавых валах.

5. Ігра на гуслях ад Алеся Чумакова

Алесь Чумакоў – вядомы беларускі гусляр, удзельнік гуртоў “Стары Ольса” і “Келіх кола”. Музыка не проста іграе на гуслях і можа навучыць гэтаму вас, а і сам займаецца вырабам гусляў ды вывучае гісторыю гэтага інструмента.

6. Лекцыі па гісторыі Менска і Полацкага княства

Для тых, хто хоча як найглыбей зазірнуць у таямніцы беларускай гісторыі, у прыватнасці гісторыі Мінска і Полацкага княства – прапануем найцікавейшыя лекцыі ад археолага, кандытата гістарычных навук Сяргея Тарасава. Сяргей Тарасаў асабіста ўдзельнічаў у раскопках у Полацку, у Верхнім горадзе ў сучасным Мінску, у Гарадзішчы на Менцы. З’яўляецца сааўтарам навуковай канцэпцыі музея гісторыі Мінска, а таксама аўтарам падручніка «Мая Радзіма — Беларусь».

7. Беларуская інтэлектуальная гульня

Беларуская інтэлектуальная гульня – паб-квіз, прысвечаны беларускай культуры (у шырокім сэнсе слова), дзе кожны можа адпачыць душой і паварушыць мазгамі, праверыць і паглыбіць свае веды. Гэта выдатная магчымасць у забаўляльнай форме далучыць калег да роднай культуры, цікава і плённа правесці час!

У Беларускай інтэлектуальнай гульні пытанні складзены так, каб было цікава браць удзел не толькі знаўцам і эрудытам, але і проста кемлівым, неабыякавым і знаходлівым людзям.

Ход гульні: Удзельнікі разбіваюцца на каманды па 5-6 чалавек, прыдумваюць назву. Гульня складаецца з 7 тураў, па 5 пытанняў у кожным, акрамя фінальнага, у ім 10 пытанняў. Адказы здаюцца на спецыяльным бланку пасля заканчэння кожнага тура. За кожны правільны адказ каманда атрымоўвае 1 бал. Перамагае каманда, якая адказала на большую колькасць пытанняў. Пераможцы ўзнагароджваюцца.
Працягласць – 1,5 гадзіны. Мінімальная колькасць удзельнікаў 10 чалавек.

8. Музычны майстар-клас ад вядомай фалькларысткі Наталлі Матыліцкай

На гэтым майстар-класе вы даведаецеся, якія спевы некалі гучалі ў Полацкім княстве (да якога адносілася і нашае Гарадзішча на Менцы), а таксама развучыце некаторыя з іх.

Для карпаратываў прапануем выступы Наталлі Матыліцкай з уласнымі спевамі, у суправаджэнні дуды, скрыпкі, гармоніка, ліры. Таксама Наталля можа выступіць у якасці вядоўцы тэматычных вечарын, да прыкладу вяселляў, з элементамі беларускага традыцыйнага абраду.